Botërori 2026, që do të zhvillohet në SHBA, Kanada dhe Meksikë, do të sjellë një format të ri historik, duke zgjeruar pjesëmarrjen nga 32 në 48 kombëtare. Ky ndryshim është ndërmarrë nga FIFA me synimin për t’u dhënë më shumë vende përfaqësueseve nga kontinente si Afrika, Azia dhe Amerika e Veriut, megjithëse mbeten diskutime mbi ndikimin e tij në cilësinë e garës.
Në formatin e ri do të ketë 12 grupe me nga 4 skuadra. Dy vendet e para të çdo grupi kualifikohen automatikisht, ndërsa do të avancojnë edhe 8 skuadrat më të mira të renditura në vendin e tretë, duke çuar në total 32 ekipe në fazën me eliminim direkt. Për pasojë, turneu do të shtohet me një raund të ri, fazën e 1/16-ve, përpara se të vijojë me 1/8-at, çerekfinalet, gjysmëfinalet dhe finalen.
Ky ndryshim sjell edhe rritje të ndjeshme të numrit të ndeshjeve, nga 64 në 104 gjithsej. Gjithashtu, turneu do të zgjasë më shumë, duke u shtrirë në rreth 40 ditë, nga 11 qershori deri më 19 korrik.
Faza e grupeve do të zhvillohet nga 11 deri më 28 qershor, duke u ndjekur menjëherë nga faza me eliminim direkt, e cila nis më 28 qershor me 1/16-at dhe vazhdon pa ndërprerje deri në fillim të korrikut. 1/8-at përfundojnë më 7 korrik, ndërsa më pas do të ketë një ditë pushim.
Gjysmëfinalet janë parashikuar të luhen nga 9 deri më 12 korrik, ndërsa më 13 korrik është vendosur një tjetër ditë pauze. Ndeshja për vendin e tretë dhe të katërt do të zhvillohet më 17 korrik, ndërsa finalja e madhe është planifikuar për 19 korrik në stadiumin “MetLife”.
