Ambasadorja e SHBA-së në Greqi, Kimberly Guilfoyle, flet gjatë një ceremonie përurimi në ndërtesën e ambasadës amerikane në Athinë, më 7 tetor.
Presidenti Donald Trump po shqyrton mundësinë e shkarkimit të Kimberly Guilfoyle nga posti i ambasadores së SHBA-së në Greqi, pas një sërë raportimesh për sjellje të pahijshme, tha të dielën një person i njohur me këtë çështje.
Trump ka ndjekur raportimet sipas të cilave Guilfoyle, e cila ishte e fejuar për katër vjet me djalin e madh të Trumpit, Donald Trump Jr., ka pranuar dhurata luksoze gjatë kohës që shërbente si ambasadore dhe ka kërkuar para në këmbim të sigurimit të qasjes te figura të administratës, përpara konfirmimit të saj në këtë detyrë.
Këto raportime kanë shkaktuar pakënaqësi te zyrtarët e lartë të administratës, veçanërisht sepse dolën në publik në kohën kur sekretari i Shtetit, Marco Rubio, po vizitonte Athinën për të mbajtur një fjalim të rëndësishëm mbi demokracinë perëndimore, në Akropol.
Sipas burimit, pritet që Trump të vendosë së shpejti nëse do ta shkarkojë Guilfoyle. Presidenti nuk e mbrojti atë kur CNN-i e pyeti të premten për akuzat.
“Sapo dëgjova për këtë. Sa keq. Dua të them, nuk e di”, tha Trump. “Sapo dëgjova pak për këtë. Nuk di shumë, por ajo ka qenë gjithmonë shumë e sjellshme.”
CNN-i i është drejtuar Shtëpisë së Bardhë për një koment.
Eric Deters, një ish-donator i Trumpit, tha se Guilfoyle i kishte kërkuar në një mesazh me tekst që t’i transferonte 100,000 dollarë për të shlyer një kartë krediti American Express, në ditët para konfirmimit të saj nga Senati.
Deters nuk ia transferoi përfundimisht paratë Guilfoyle-s, duke shpjeguar se në atë kohë nuk kishte mjete financiare të disponueshme.
Një avokat i ambasadores i tha gazetës Wall Street Journal, e cila publikoi e para raportimin për mesazhet, se Guilfoyle kundërshtonte vërtetësinë e tyre.
Sipas personit të njohur me çështjen, Guilfoyle u mohoi zyrtarëve të administratës javën e kaluar se i kishte dërguar këto mesazhe.
Guilfoyle ka ruajtur marrëdhënie të afërta me familjen Trump. Pas ndarjes nga Donald Trump Jr., ajo mori një nga emërimet më të lakmuara diplomatike, postin e ambasadores në Greqi.
Aleatë të presidentit dhe të djalit të tij i thanë CNN-it se e konsideronin këtë episod të turpshëm, megjithëse ende nuk është e qartë nëse Guilfoyle do të përballet me pasoja.
Trump ka bërë vazhdimisht të qartë se nuk i pëlqen kur aleatët e tij përfitojnë financiarisht nga marrëdhënia që kanë me të.
Të premten, zëvendëspresidenti JD Vance nuk pranoi të shprehej nëse Guilfoyle duhet të përballet me pasoja, duke thënë se nuk dëshironte t’i “gjykonte njerëzit në gjykatën e opinionit publik”.
Megjithatë, zëvendëspresidenti tha se, në përgjithësi, nuk ndihej rehat me skemat ku paratë përdoren për të siguruar qasje te zyrtarët.
“Sigurisht që nuk më pëlqen kur dikush shet mundësinë për të pasur qasje te një zyrtar tjetër qeveritar, veçanërisht te një zyrtar i nivelit të lartë”, tha ai.
“Le të shohim se cila është e vërteta. Dhe, natyrisht, nëse ka ndodhur diçka e keqe, atëherë njerëzit duhet të mbajnë përgjegjësi për të”, shtoi Vance.
