Hakerët kanë arritur që, gjatë muajve të fundit, të depërtojnë në sistemet elektronike të muzeut të Firences “Uffizi” dhe të vjedhin kodet e sigurisë që kontrollojnë alarmet dhe hyrjet e tyre, raportoi gazeta italiane Corriere della Sera.
Sipas gazetës, në këtë mënyrë hakerët tani e dinë se ku ndodhen kamerat e sigurisë dhe nga cilat pika mund të kalojë dikush që dëshiron të tentojë të vjedhë veprat e çmuara artistike të ekspozuara në Uffizi.
Sipas gazetës, sendet më të vlefshme nga Thesari i Dukeve të Mëdhenj, të vendosura në Palazzo Pitti, ish-rezidenca e familjes Medici, u zhvendosën në bankën qendrore si masë paraprake.
Corriere shton se muzeu është kërcënuar për të paguar një shumë të konsiderueshme parash, në mënyrë që këto të dhëna të ndjeshme të mos dalin përmes ashtuquajturit “internet i paligjshëm”.
Duket se hakerët arritën të merrnin kodet e sigurisë për shkak të teknologjisë së vjetër të një pjese të faqes së internetit të muzeut dhe veçanërisht të sistemit të imazheve nga sallat e tij.
Hakerët dyshohet gjithashtu se kanë vjedhur arkivin e plotë dixhital të departamentit fotografik, që përmban imazhe dhe dokumente të krijuara gjatë dekadave, thuhet në raport.
Vitin e kaluar, hajdutët shënjestruan Muzeun e Luvrit në Paris, duke vjedhur bizhuteri me vlerë 102 milionë dollarë që ende nuk janë gjetur.
