Vetëm tri ditë (4 qershor 2026) para zgjedhjeve parlamentare në Kosovë, ministrja në detyrë e Industrisë, Ndërmarrësisë, Tregtisë dhe Inovacionit, Mimoza Kusari-Lila, ka marrë dy vendime ndaj tregtisë me Serbinë, vendime këto krejt populiste, pasi që po ndodhin në vlugun e fushatës.
Përveç se populiste, këto vendime shpërfaqin fytyrën e vërtetë të kësaj Qeverie, që në publik Serbinë e portretizon si armik të përbetuar, ndërsa prapa kamerave koordinohet dhe pajtohet të bëjë tregti me të.
Kusari-Lila, që dikur ishte shefe e ‘koordinimit’ me Listën Serbe, tash në rolin e ministres paska marrë vendim për fillimin e hetimit zyrtar lidhur me importin e farës së grurit me origjinë nga Serbia, pasi, siç ka thënë ajo, po dyshohet se fara e grurit e importuar nga Serbia po shitet me çmime damping (produkte të importuara kur konstatohet se ato po shiten në treg me çmime artificialisht të ulëta, zakonisht më të ulëta se çmimi në vendin e origjinës ose edhe nën koston e prodhimit) dhe rrjedhimisht po e dëmton prodhuesin vendor. Por, çuditërisht, ky vendim vjen vetëm pak orë para se të shkohet në kutitë e votimit.
Por në këtë vendim ka edhe hipokrizi të theksuar, që jemi mësuar ta shohim gjatë kësaj qeverisjeje nga Kurti dhe vartësit e tij.
Ja pse këta nuk e kanë seriozisht as me Serbinë dhe as me shtetin e së drejtës dhe zhvillimor.
Ditë më parë, “Paparaci” ka publikuar biseda të ish-ministres Rozeta Hajdari lidhur me skandalin e rezervave shtetërore.
Në këto biseda, Hajdari pa hezitim kishte pranuar blerjen e grurit nga Serbia, ndërsa kishte refuzuar atë nga Kosova për arsye të çmimit, e që tani kolegia nga partia e “babës”, Kusari-Lila po hidhet në mbrojtje të prodhuesve vendor, për t’i mbrojtur nga Serbia, sepse kështu duhet të krijhet përshtypja pak orë para zgjedhjeve.
Këto biseda “sekrete” dëshmojnë se si ish-ministrja Rozeta Hajdari nuk kishte vija të kuqe për produktet me origjinë nga Serbia.
Sipas komunikimeve, çmimi i grurit në Serbi ishte më i leverdishëm sesa në tregun vendor. Gruri në Serbi kushtonte rreth 307 euro për ton, ndërsa në Kosovë çmimi sillej nga 360 deri në 370 euro.
Komunikimet e zhvilluara më 5 mars 2022:
Grupi në WhatsApp mes Rozeta Hajdarit, Irfan Lipovicës dhe Hafiz Garës.
Irfani: Rreth 307 në Serbi dhe rreth 360-370 në Kosovë, por deri të hënën nuk po ofertojnë.
Hafiz: D.m.th. gruri serb deri në Kosovë 360-370 euro.
Irfani: Rreth 307 në Serbi dhe rreth 360-370 në Kosovë, por deri të hënën nuk po ofertojnë.
Rozeta: Kush?
Irfani: Kështu na tha njëri nga tregtarët.
Hafiz: Një tregtar dhe një mulli: Isa Hajdari dhe Imer Mustafa.
Rozeta: Mirë pra, kontaktoji.
Siç mund ta shihni, nuk është se kjo Qeveri është preokupuar ndonjëherë për t’i mbrojtur prodhuesit vendorë; madje kishte shprehur interesim që gruri për rezervat shtetërore të blihej në Serbi dhe jo nga tegtarët në Kosovë.
Vendimet e Kusari-Lilës edhe mund të ishin pozitive, sikur të merreshin gjashtë vite më parë, pas ardhjes në pushtet, e jo në kohë fushate, ndërsa në grupe “sekrete” të bëhej tregti me Serbinë dhe të injoroheshin prodhuesit vendorë.
