Dinamo Zagrebi përgatitet për një nga ndeshjet më të rëndësishme të fazës në grupe të Europa League, teksa në raundin e pestë udhëton drejt Francës për t’u përballur me Lille, në një duel ku pikët mund ta afrojnë ndjeshëm me fazën me eliminim direkt.
Fundi i pjesës së parë të sezonit ka qenë tradicionalisht periudha më sfiduese për klubin kroat dhe rënia e formës para nëntorit e bëri ekipin të dukej i paqëndrueshëm. Në atë moment, vetëm një lojtar mbeti shtylla kryesore e lojës së Dinamos, Arbër Hoxha.
Tifozët shpesh shprehnin dyshime, madje edhe skepticizëm: “Nuk është për Dinamon”, thoshin disa prej tyre. Kritikët shtuan presionin veçanërisht për shkak të insistimit të trajnerit Jakirovic, i cili e quajti futbollistin shqiptar “raketë”, si dhe për shumën e konsiderueshme të paguar për transferimin e tij në janar 2024.
Megjithatë, Hoxha i ka rrëzuar me radhë dilemat. Ai asistoi në fitoren historike ndaj Betisit, shënoi në Selanik dhe realizoi golin vendimtar kundër Rijekës, momente kyçe që udhëhoqën Dinamon drejt titullit. Edhe pse sezonin e kaluar pati më pak hapësirë për shkak të ardhjes së Marko Pjacës, drejtori Zvonimir Boban insistoi për qëndrimin e tij, duke besuar tek potenciali i lojtarit, shkruan ‘index.hr’.
Sot, tre muaj e gjysmë pas fillimit të sezonit, ai është bërë lojtari më i rrezikshëm i Dinamos dhe i vetmi sulmues me formë të qëndrueshme, çka i siguroi edhe rinovimin e kontratës.
Dy momente nga derbi me Hajdukun e ilustrojnë më së miri natyrën e tij. Fillimisht, Hoxha shpërdoroi një rast ideal pas një pasimi të Misict për shkak të një kontrolli të pasaktë. Por pak minuta më vonë, ai mori topin rreth 60 metra larg portës, përshkoi terrenin duke kaluar dy kundërshtarë dhe shënoi golin që vendosi sfidën, duke rikthyer Dinamon në rrugën e duhur.
Arbër Hoxha mishëron kontrastet që e bëjnë të veçantë, herë vendimmarrje jo perfekte, herë shpërthime të pabesueshme. Por mbi të gjitha, ai mbetet lojtari më i paparashikueshëm dhe më i rrezikshëm i Dinamos, një kërcënim që rivalët ende nuk kanë gjetur mënyrën ta neutralizojnë.
